“İlham Əliyev – 20 il. Azərbaycan iqtisadiyyatının inkişafında vergi sistemi” fotolarda

     Naxçıvan Muxtar Respublikasının Dövlət Vergi Xidməti tərəfindən dövlət başçısı İlham Əliyevin Azərbaycan Respublikasının Prezidenti seçilməsinin 20 illiyi münasibətilə “Azərbaycan iqtisadiyyatının inkişafında vergi sistemi” mövzusuda sərgi təşkil olunub. Sərgidə Naxçıvan Muxtar Respublikasında fəaliyyət göstərən vergi ödəyicilərinin nümayəndələri və Naxçıvan Dövlət Universitetinin tələbələri iştirak ediblər.

     Naxçıvan MR Dövlət Vergi Xidmətinin rəisi Abbas İsmayılov bildirib ki, Prezident İlham Əliyevin 20 illik fəaliyyəti dövründə vergi orqanlarında funksional idarəetmənin səmərəliliyinin artırılması, vergi sisteminin hədəflərinə xidmət edən dinamik struktura malik müasir inzibatçılığın qurulması istiqamətində genişmiqyaslı islahatlar həyata keçirilib.

     Tədbir iştirakçılarını 8 Noyabr - Zəfər Günü münasibətilə təbrik edən Xidmət rəisi Müzəffər Ali Baş Komandan İlham Əliyevin müdrik və qətiyyətli komandanlığı altında rəşadətli Azərbaycan Ordusunun doğma torpaqlarımızı işğaldan azad edərək dövlətimizin ərazi bütövlüyünü əbədi bərpa etdiyini, bununla da bütün regionda sülhün və əmin-amanlığın, azadlıq və rifahın qarantına çevrildiyini xatırladıb. 

     Çıxışlarda Naxçıvan Dövlət Universitetinin rektoru Elbrus İsayev və iş adamı Teymur Rzayev ölkə Prezidentinin rəhbərliyi altında Azərbaycanda  həyata keçirilən siyasi və iqtisadi islahatlardan bəhs ediblər.

     Sərgidə ümummilli lider Heydər Əliyevin təməlini qoyduğu inkişaf strategiyasını yeni çağırışlar şəraitində layiqincə davam etdirən dövlət başçısı İlham Əliyevin siyasi və iqtisadi fəaliyyəti barədə fotostendlər nümayiş olunub.