Fövqəladə hallarla bağlı maarifləndirici tədbir keçirilib

     Naxçıvan Muxtar Respublikası Fövqəladə Hallar Nazirliyinin və Naxçıvan Muxtar Respublikası Dövlət Vergi Xidmətinin birgə təşkilatçılığı ilə Xidmətin əməkdaşları üçün fövqəladə hallar zamanı davranış qaydaları barədə maarifləndirici tədbir keçirilib.

     Fövqəladə Hallar Nazirliyinin Fövqəladə halların xəbərdar edilməsi şöbəsinin əməkdaşları baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə müvafiq məlumatlar verib.

     Çıxışlarda fövqəladə halların təsnifatı, muxtar respublika üçün xarakterik olan fövqəladə hallar, o cümlədən yanğınların baş vermə səbəbləri və bu zaman zəruri davranış qaydaları, dəm qazı təhlükəsi barədə ətraflı məlumatlar verilib, FHN-in “112” qaynar telefon xəttinin təyinatı izah olunub.

     İnteraktiv formada keçirilən tədbirlər zamanı suallar ətraflı cavablandırılıb.